ان الله يرانا

Description

كان ياما كان ولا يحلى الكلام إلا بذكر النبي عليه الصلاة والسلام.

كان في ثلاث أولاد قاعدين مع باباهم، ثلاث أولاد شاطرين حلوين بيسمعوا كلام باباهم ومامتهم، قال لهم باباهم:

— يا أولادي أنا هدي كل واحد فيكم بيضة ياكلها في مكان محدش يشوفه أبداً أبداً.

خد ابنه الأولاني بيضة ودخل أوضة نومه قفل على نفسه الباب علشان محدش يشوفه وكل البيضة.

ابنه الثاني طلع فوق سطوح البيت علشان ياكل البيضة ومحدش برضه يشوفه، لكن ابنه الثالث مكلش البيضة اللي معاه ورجع لباباه. سأله باباه وقال له:

— إنت ليه مكلتش البيضة يا حبيبي؟

قال له:

— يا بابا كل مكان أروح فيه ألاقي إن ربنا شايفني وسامعني مفيش مكان أبداً رحت فيه إلا لما يكون ربنا شايفني ومطلع عليا وسامعني، وعشان كده يا بابا أنا معرفتش آكل البيضة لأن حضرتك قلت لي روح مكان مفيش حد أبداً أبداً يشوفك وربنا شايفني في كل مكان.

— أيوه يا إبني كلامك صح ربنا سبحانه وتعالى شايفنا وسامعنا، وعلشان كده دايماً دايماً نعمل كل الحاجات الصح وكل الحاجات الكويسة، مفيش مكان إلا وربنا سبحانه وتعالى مطلع علينا وشايفنا وسامعنا، مينفعش ناخد حاجة مش بتاعتنا، ومينفعش نقول كلام مش كويس، ومينفعش نعمل أي حاجة وحشة وعلشان دايماً ربنا يحبنا لازم نخلي بالنا ودايماً دايماً نطيع ربنا ونسمع كلامه علشان ربنا سبحانه وتعالى يرضى عنا.

وبكده يا أصدقائي اتعلموا الثلاث أولاد إن ربنا سبحانه وتعالى شايفنا في كل مكان وسامعنا كمان وعلشان كده لازم نخلي بالنا لازم نكون شاطرين وبنسمع كلام ماما وبابا واخواتنا الكبار، ونحب أخواتنا الصغيرين مينفعش أبداً أبداً نزعق لهم ولا نزعلهم ولا كمان ما نعملش الواجبات ولا ما نسمعش الكلام، لأ… ده احنا هنكون شاطرين من النهاردة مش هنكذب أبداً وهنكون شاطرين وهنسمع الكلام مش هناخد حاجة مش بتاعتنا وهنصلي كل الصلوات في وقتها علشان ربنا يحبنا ونطيع ربنا وربنا يرضى عنا.

وتوتة توتة خلصت الحدوتة واستنوني في حكاية جديدة كل يوم ومتنسوش تشتركوا في قناة حواديت ماما نونا وتفعلوا الجرس علشان يوصلكم كل جديد من الحواديت وكمان زوروا صفحة حواديت ماما نونا على الفيسبوك.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *